Amakuru

Burera: Barataka indwara ziterwa n’umwanda kuko imiyoboro y’amazi bubakiwe yumye

Bamwe mu baturage bo mu mirenge ya Ruhunde na Gatebe, mu Karere ka Burera barataka ko bakomeje kurwara bakanarwaza indwara ziterwa n’umwanda kubera gukoresha amazi mabi yo bishanga n’ayimvura, ibi bikaba ngo bitarwa no kuba  bari baregerejwe imiyoboro y’amazi meza ariko akaba atagera mu mavomo. Ni mu gihe ubuyobozi  bw’akarere bubasaba kuba bihanganye kuko buri gushaka uko bukemura iki ikibazo cy’amazi meza adahagije kiri mu karere kose.

Aba baturage bavuga ikibazo cyo kutagira amazi meza bakajya kuvoma ayo mu bishanga bikabatera indwara ziterwa n’umwanda gituruka ku kuba barahawe umuyoboro ubagezaho amazi ariko kugeza ubu amavomo akaba yarumye nta mazi aherukamo.

Umwe muribo yagize ati: “ Ayo tuvoma adutera inzoka cyangwa se tugategereza amarekano akaba ariyo tunywa.…ntabwo amazi atugeraho hano, kirazira, imigezi turayifite ariko nta mazi azamo, turifuza ko namwe abanyamakuru mwatuvuganira nuko bakaza bakaduha umugezi mwiza, bagatanga impombo nziza zizatuyoboraho amazi azatugirira akamaro, ntitujye tuyabura.”

Undi ati: “ baduhaye amazi ariko tuyabona iyo imvura yaguye kuko nibwo aza mu migezi. Biba ngombwa ko nk’abaturiye urugezi, banywa amazi mabi yo mu rugezi. Ubwo bituma tunarwara kandi byitwa ko muri Gatare harimo amazi, nk’ubu turi kuvoma wenda hari uwaba yitumye ku gasozi nuko bikamanuka bikajyamo. Yaba ari nk’ikintu cyapfuye cy’inyamaswa, nabwo tukayavoma. Urumva ko tuvoma microbes nyinshi.”

Umuyobozi w’akarere ka Burera, MUKAMANA Soline

Umuyobozi w’akarere ka Burera, MUKAMANA Soline, avuga ko ikibazo cy’amazi meza kiri muri aka karere bari kugishakira igisubizo. Asaba abaturage kuba bihanganiye gukoresha amazi y’imvura ndetse bakibuka kuyateka kugira ngo bibarinde indwara.

Yagize ati: “ Aka niko karere gafite amazi makeya ugereranyije n’utundi turere tugize igihugu. ngira ngo tutagiye Ruhunde na Gatebe ntabwo ariho gusa. Naguha urugero nk’umurenge wa Rugengabare utaragiraga amazi hose ariko ubu amazi yatangiye kugera mu tugali 3 kuri 5, mugihe imvura irimo kugwa bajye bareka amazi ariko bayakoreshe bayatetse kugira ngo nabwoo batayanywa uko biboneye akabatera indwara, naho ubundi …ugiye kubakwa Ruhunde na Gatebe uzabafasha nuramuka wuzuye kandi ni uyu mwaka.”

Ubusanzwe ikibazo cy’amazi meza adahagije mu karere ka Burera kimaze igihe muri aka gace k’imisozi miremire. Byitezwe ko bizakemurwa n’imiyoboro n’inganda z’amazi biri kugenda byubakwamo. Aha harimo nk’inganda ebyiri biteganyijwe ko zigiye kubakwa muri aka karere, aho rumwe ruzageza amazi meza mu mirenge ya Rusarubuye, Rugengabare, Cyeru ndetse n’umurenge wa  Kinoni.

 

Carine Kayitesi

Click to comment

Leave a Reply

Your email address will not be published. Required fields are marked *

IZASOMWE CYANE

To Top