Kuri uyu wa gatatu, Minisitiri w’Ibidukikije, Dr. Valentine Uwamariya Arakwiye, yagiriye uruzinduko rw’akazi mu Karere ka Gicumbi, asura imishinga itandukanye igize gahunda ya Green Gicumbi, agamije gusuzuma uko ishyirwa mu bikorwa n’uruhare igira mu kurengera ibidukikije no guteza imbere imibereho myiza y’abaturage.
Uyu Minisitiri yari aherekejwe n’Umuyobozi Mukuru w’Ikigega cy’Igihugu gishinzwe kurengera ibidukikije (Rwanda Green Fund), Bwana Teddy Mugabo, Umuyobozi w’Akarere ka Gicumbi, Bwana Nzabonimpa Emmy, ndetse n’abandi bafatanyabikorwa b’ingenzi muri iyi mishinga.
Mu byo Minisitiri yasura harimo amaterasi akumira isuri (radical terraces), amashyamba yangiritse yamaze gusubizwa ubuzima, umudugudu w’icyitegererezo wubatswe mu buryo burengera ibidukikije utuyemo imiryango 60 y’abaturage yimuwe mu manegeka, ndetse n’umushinga w’icyayi cyahinzwe ku buso bwa hegitari 50 mu misozi miremire.
Minisitiri Arakwiye yanaganiriye n’abaturage bungukiye muri iyi mishinga, bagaragaza uko yafashije kuzamura imibereho yabo, kubarinda ingaruka z’imihindagurikire y’ikirere no kongera ubushobozi bwo kwihanganira ibiza.
Uru ruzinduko rwahaye Minisitiri ishusho nyayo y’uruhare gahunda ya Green Gicumbi igira mu gusana ubutaka, kurengera ubuzima bw’abaturage no guhindura imibereho yabo mu Karere ka Gicumbi.
Asoza uruzinduko rwe, Minisitiri yashimye intambwe imaze guterwa, asaba abaturage n’inzego z’ibanze gukomeza kurengera ibyagezweho no gukoresha neza amahirwe yatanzwe kugira ngo habeho iterambere rirambye n’ubukungu buhamye mu gihe kirekire.
Kayitesi Carine
