Uyu munsi, mu Murenge wa Katabagemu, Akagari ka Nyakigando, habereye ubukangurambaga bwo kurwanya imirire mibi n’igwingira bwateguwe mu rwego rwo guteza imbere imikurire myiza y’abana bato. Ubu bukangurambaga bwari bufite insanganyamatsiko igira iti “Hehe n’Igwingira”.
Bwari bugamije gukangurira abaturage, by’umwihariko ababyeyi n’abarezi, gushyira imbaraga mu gutegura no gutanga indyo yuzuye ku bana, hagamijwe kurwanya imirire mibi n’igwingira. Muri iki gikorwa, abana bagaburiwe indyo yuzuye nk’urugero rufatika rwo kwerekana akamaro k’imirire iboneye.
Umuyobozi w’Akarere wungirije ushinzwe imibereho myiza y’abaturage, @murekajul, yasabye ababyeyi kwita ku mirire myiza n’isuku, agaragaza ko ari ingenzi mu kurinda abana indwara zikomoka ku mwanda. Yibukije ko abana bagomba guhabwa indyo yuzuye igizwe n’ibirinda indwara, ibitera imbaraga n’ibyubaka umubiri, anashimangira akamaro ko konsa umwana mu mezi atandatu ya mbere nta kindi kivanzemo, no gukomeza kumuha imfashabere kugeza agejeje imyaka ibiri.
Yasoje ashimangira ko buri muryango ufite inshingano zikomeye mu kurengera ubuzima, uburenganzira n’ejo hazaza h’abana binyuze mu kubitaho kuva bakiri bato.
Kayitesi Carine
