Minisiteri y’Ubuzima yatangaje ko kuri uyu wa Gatanu tariki ya 26 Kamena 2020, habonetse abarwayi bashya 8 b’icyorezo cya Koronavirusi (COVID-19) mu bipimo 3,763 byafashwe mu masaha 24 ashize, hataha abantu 13 bakize neza.

Umubare umaze gukira ugera kuri 398 muri 858 bamaze kubonwaho icyorezo  cya Corona virus mu Rwanda.

Kugeza ubu abakirimo kwitabwaho n’abaganga bageze kuri 458 mu barwayi bamaze kuboneka  mu bipimo 130,047 byafashwe kuva umurwayi wa mbere yatahurwa muri Werurwe kugeza ubu.

Iki cyorezo kimaze gutwara ubuzima bw’abarwayi babiri mu Rwanda.

Igikorwa cyo gupima abantu mu buryo bwa rusange mu Gihugu kirakomeje, ndetse Akarere ka Rusizi n’aka Rubavu twashyizwe mu kato mu gihe hagisuzumwa abantu ngo harebwe uko ubwandu buhagaze muri utwo duce.

Imirenge imwe y’Akarere ka Rusizi n’imidugudu y’uturere rubiri tw’Umuyi wa kigali yasubijwe muri gahunda ya Guma Mu Rugo (lock down) hagamijwe gukumira ikwirakwizwa ry’icyo cyorezorezo.

Mu tundi turere, ingendo zihuza intara zitandukanye n’Umujyi wa Kigali n’ibikorwa bitandukanye by’ubuzima busanzwe birakomeje.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 348,871 barimo 166,684 bakize n’abandi 9,098 bahitanywe na cyo. Abamaze kwandura ku Isi bangana na 9,826,381 barimo abakize 5,305,202 n’abapfuye 494,461.

Carine Kayitesi