Urushyize kera rushize utsinzwe
Urwo washoje ngo uri icyago !
Ubwo icyaha kiguhama
Urushyize kera ruraguhagama
Koronavirusi urikora
Koko rero ubwo urikamata
Koko uza wikoreye umupangu
Koko udupanga iyo mu bipangu
Turagukundira ukaza ipingu
Tutagupangiye ubwo urakinga
Twapingaga n’imiburo
Urushyize kera ntirugukeza !
Turakangutse cyo itegura
Tuje twese ngo tugushinje
Tutagukeza abo wahemukiye
Urushyize kera ruragukikije
Itegure tuguhe akato
Tuguhe Induru nta ndoro
Tugutuze iyo mu itongo
Tuzakwima n’inyabutongo
Urushyize kera rugukinagiza
Abo wakingiraniye mu nzu
Abo wacyahaga nk’ icyago
Abo bakuzi ko uri icyaha
Urushyize kera ngo uri icyasha !
Urerekeza he se Koro….
Ukaze imikaka turayikura
Urazibandwa zigana kwa nde
Urushyize kera ko rugucyaha ?
Rero nanjye ngo urabandwa,
Nta n’imwe yo mu mandwa
Yakwemera uko kubandwa
Urushyize kera rurakubamba !
Lyangombe rya Babinga
Yakohereza kubunga
Yakwitabaza Nyundo
Urushyize kera mukarurwana !
Isogi y’agasi wayisoroma ?
Iyo urayizi yitwa Binego
Ibinegu yaguha bigayisha
Urushyize kera rukagugasha
Mugasa Kagoro na Nyabirungu
Bakugora bakakugorora
Koronavirusi uretse kubeshya
Urushyize kera ubu ntiruguhashya ?
Ntuzigimba guterekera
Ntiwacika Rutindangeri
N’aho kandi yadohora
Nyirabarera akunda abana
Urushyize kera rubagushinja
Ngaho egera Nyirasafari
Agufate mu ijosi ifuro rize
Afande uzaza agufate afunge
Urushyize kera rugufatire aho !
Koronavirusi urirukira he ?
Ubu se uzajya mu bu Shinwa ?
Aho wavuye uvusha amaraso ?
Urushyize kera ruragucyaha !
Uzirukira se mu Buyapani
Warabupangiye kubusenya ?
Ubu Putine wo mu Burusi
Urushyize kera arwiteguye
We na Tarampu muri Amerika
Ko wabateye igisebo cyane
Bo bakurwaye nk’igiebe
Ngo bakurwanye urushyize kera
Korona ntiwakatira n’i Kongo
Na Kameruni baragushaka
Ko wabateye ibyo gushinyiza
Urushyize kera ruragushaka
Sierra Leone na Senegali
Sinkubeshye basizoye
Isereri baserereye
Biteguye urushyize kera
Gambiya Gabo na Gana
Barigamba bagambana
Imyigaragambyo wazanye Iwabo
Yigaragarize urushyize kera
Ntuzahungira no mu bihuru
By’iyo hepfo aho mu Burundi
Ikidodo se wabateye
Urushyize kera nirukikubaza ?
Ntabwo uzaza hano mu Rwanda
Urwango wazanye turaruzi
Turabimenyereye kurwambarira
Urushyize nirwo turwana !
Urimo uratanya ujya i Burayi
U Butaliyani warabuteye
Ukabatesha kurera abana
Ubu baguteje urushyize kera !
Ubu Faransa buguhiga
Buri mu mihigo u Bubiligi
Ubu Giriki n’ubu Holand,
Baraguhigira kuguhunda
Urushyize kera ngo ruguhande !
Isi yose uko wayisaritse
Yahagurutse ngo ize igusenye
Iyo usiribanga usisibiranya
Iguteye urushyize kera
Nta kizabuza kukuganza
Nta gisibya ya mikaka
Nta kizatuma itakuka
Urushyize kera rurakukumba
Ibyo kuramba urabyibagirwe
Ibyo kurambirana byo rwose
Ibyo bireze ku isi yose
Ibyo turabitega urushyize kera !
Narose twambariye itabaro
Ndota twivuga imyato
Ibyo byo kandi ndazikabya,
Ndabona icyoko cyera umucyo
Urushyize kera rugamburuje
Cya cyago cyo gatsindwa
Koronavirusi irakambuye
Kuko rwose ibuze igikumba
Kuko urugamba rushyize kera
Kureka ingendo izi zidakenewe, Kutitabira ibirori byinshi,
Bizaduteranya turi benshi,
Abakunzi b’agatama,
Bakakagomerera imuhira,
Ubusanzwe kuguma imuhira
Kuyirinda nyako ni oki.
Gukaraba intoki uko tubibasha
Urugamba rshyize kera,
Ntiruturambire kururwana
Rurayiganza tubyine intsinzi
Irajye iyo yenda yo kagenda
Irapfe ipfuye yo gapfusha
Urushyize kera rurayihinyuza !
Urushyize kera
Rugamburiza abarwigimba rwa Rutaganira ndi Rugarukirwa Mudakikwa abahizi barandirimba.
Uwo ishema rivuna nzirana n’abavunura abavunyi bavuga urwo ntari mo rurushya umwana !
Bimenyimana Jérémie
Umuhanzi akaba n’umunyamakuru
Bimenyimana bya Munyandamutsa
