Indwara zitandura ni kimwe mu bihangayikishije isi muri iki gihe mu ngeri zitandukanye z’abantu, muri iki gihe isi yugarijwe n’icyorezo cya Covid-19 usanga abarwaye izo ndwara bari mu ikiciro kizahazwa cyane n’iki cyorezo kuruta abatazirwaye.
Zimwe mu ndwara zitandura harimo indwara z’umutima, Diabete, Kanseri , indwara z’ubuhumekero n’izindi.
Izi ndwara ziza mu zica abantu benshi ku isi aho habarurwa Miriyoni 41 z’abantu bicwa nazo buri mwaka; ni ukuvuga 71% by’abantu bapfa buri mwaka bishwe n’izindwara.
Nk’uko ubushakashatsi bubigaragaza, abantu bazahazwa na Covid-19 kurusha abandi ni abari hejuru y’imyaka 60, abasanganywe indwara zitandura ndetse n’abagore batwite nk’uko byatangajwe na Dr Cyprien IRADUKUNDA; inzobere mu kuvura Diabete mu bitaro bya KANYINYA ahavurirwa abarwaye COVID-19. yagize ati” Afurika yepfo; igihugu cyarwaje ndetse kikanapfusha abantu bayingayinga abapfuye k’umugabane wose wa Afurika, mu bapfa bishwe na Covid-19, 61% basanzwe barwaye umuvuduko w’amaraso, 52% barwaye Diabetes naho 45% ni abari hagati y’imyaka 60-69.”
Dr Cyprien Iradukunda
Akomeza agira ati”mu bihugu nka Kenya mu bantu bicwa na Covid-19 kimwe cya kabiri baba basanganywe indwara zitandura, ni mu gihe muri Repuburika iharanira Demokarasi ya Congo ho mu bantu bapfa bishwe na Covid -19, 85% baba basanzwe barwaye indwara zitandura.
Dr.NYIRIMIGABO Eric ushinzwe imishinga mu ihuriro ry’imiryango irwanya indwara zitandura mu Rwanda (Rwanda NCD Alliance) aravuga Ati”
Covid-19 ntizahaza abarwaye indwara zitandura gusa, ahubwo n’abarwaye izindi ndwara nka VIH/SIDA, Igituntu n’izindi ndwara zandura,bari mu bibasirwa cyane nicyi cyorezo cya Covide-19.
Kugeza ubu Covid-19 nta muti nta n’urukingo ifite, gusa inzobere mu by’ubuvuzi ntiziryamye zirakora cyane ziyishakira urukingo, ibimenyetso byayo birimo inkorora ijyana no kubabara mu mihogo, umunaniro ukabije, guhinda umuriro, ibicurane n’ibindi. kuyirinda ni ukwambara agapfukamunwa, guhana intera hagati y’umuntu n’undi ndetse no gukaraba intoki kenshi.
KAYITESI Carine
