Ibi ni ibitangazwa na muganga Nkeshimana Menelas, ukorerera mu bitaro bya CHUK-Kigali ukurikiranira hafi amakuru y’abarwayi bahagana mu rwego rwo kurwanya COVID-19 mu gihe haba hari uyigaragayeho.
Dr Nkeshimana Menelas Umuganga mu bitaro bya CHUK ukurikiranira hafi ibibazo bya Covid-19 muri ibyo bitaro
Dr Nkeshimana avuga ko COVID -19 ifata abantu banyuranye harimo abanduye virus itera Sida, abarwara diyabete, umutima, asima n’izindi ndwara.
Kubafite virusi itera Sida bakandura na Covid-19 avuga ko ntaho batandukaniye n’abandi barwayi basanzwe mu gihe baba bafata imiti neza.
Muganga avuga ko iyo babonye umuntu ufite virusi itera Sida icyo bakora ari kumufasha gukomeza gufata imiti neza kugira ngo ubudahangarwa bw’umubiri we budasubira inyuma akanavurwa Covid-19 nk’abandi barwayi .
Agira ati” By’umwihariko uwo dusanganye virusi itera Sida, tubanza kumenya niba asanzwe yivuza neza,akurikiza inama ahabwa na muganga, nyuma yaho tukamuvura virusi ya Covid-19”
Muganga avuga ko impamvu babanza kumenya niba yivuza neza virusi itera Sida ni uko iyo atarasanzwe abikora nk’uko bikwiye usanga bigorana kuvura Covid-19, kuko umubiri we ntabudahangarwa uba ufite, iyo ayo makuru amaze kumenyekana habaho kwitabwaho mu buryo bw’umwihariko.
Dr Nkeshimana yemeza neza ko hari abantu bari baranduye virusi ya COVID-19 bakaba bari bari bafite virusi itera Sida , bavuwe abenshi muri bo bakaba barakize, basubira mu buzima busanzwe,n’abakirwaye avuga ko bameze neza .
Ifoto igaragaza uko abarwayi bafite Covid-19 bitabwaho iyo bari mu bitaro
Amakuru atugeraho avuga ko kugeza ubu mu Rwanda nta muntu n’umwe urahitanwa na COVID-19.
Leta y’u Rwanda ikomeje gukangurira abaturarwanda kwirinda icyorezo cya COVID-19 bubahiriza amabwiriza atangwa na minisiteri y’ubuzima irimo gukaraba neza intoki kenshi k’umunsi hakoreshejwe isabune cyangwa imiti kabuhariwe mu kwica mikorobe, kwirinda kujya ahantu hateraniye abantu benshi, gushyira intera ya metero imwe hagati ya mugenzi wawe no kwihutira kujya kwa muganga mu gihe ugize kimwe mu bimenyetso ugaragaza bya Ccovid-19.
Ibyo bimenyetso ni kugira umuriro mwinshi , gukorora no kubabara mu mihogo, gucika intege n’ibindi.
Carine Kayitesi
