Umusaruro Mbumbe w’Igihugu cy’u Rwanda (GDP) wazamutse ku kigero cya 11.8% mu gihembwe cya gatatu cya 2025, ugera kuri miliyari 5,525 Frw, uvuye kuri miliyari 4,659 Frw wariho mu gihembwe nk’iki cya 2024.
Iri zamuka rikurikiye iryari ryarabaye mu bihembwe byabanje, aho GDP yari yazamutseho 6.5% mu gihembwe cya mbere na 7.8% mu gihembwe cya kabiri cya 2025.
Nk’uko byatangajwe n’Ikigo cy’Igihugu cy’Ibarurishamibare (NISR), iri terambere ryatewe ahanini n’urwego rwa serivisi rwagize 57% by’umusaruro mbumbe, inganda zigira 22%, ubuhinzi 15%, naho imisoro ikagira 6%.
Ubuhinzi bwazamutseho 10%, bushingiye ku izamuka ry’ibihingwa ngengabukungu byiyongereyeho 35%, ubworozi bwiyongera 6%, n’uburobyi bwiyongeraho 34%.
Inganda zazamutseho 17%, bitewe ahanini n’izamuka ry’umusaruro wa sima (44%), ibikomoka ku byuma (28%) n’imiti (25%).
Urwego rwa serivisi rwazamutseho 10%, ruterwa n’izamuka ry’ubucuruzi (20%), itumanaho n’ikoranabuhanga (17%) n’imari (10%), mu gihe amahoteli n’amaresitora byagabanyutseho 3%, naho serivisi z’ubuzima zigagabanukaho 16%.
Iri zamuka rya GDP rigaragaza ko ubukungu bw’u Rwanda bukomeje kwiyongera, nubwo hari inzego zimwe zikigaragaza intege nke.
Kayitesi Carine
