Ku kibuga cya Ngororero Stadium, hatangijwe ku mugaragaro amarushanwa y’Umurenge Kagame Cup, igikorwa cyitabiriwe n’abayobozi batandukanye b’Akarere ka Ngororero, abayobozi b’Inzego z’Umutekano zikorera muri aka Karere, abayobozi b’Imirenge, abayobozi b’amakipe yitabiriye aya marushanwa, urubyiruko ndetse n’abaturage b’Umurenge wa Ngororero.
Umuyobozi w’Akarere ka Ngororero yashimye gahunda ya Kagame Cup, ayigaragaza nk’urubuga rwiza rufasha mu gushimangira imiyoborere myiza, guteza imbere impano z’urubyiruko no kwimakaza siporo nk’inkingi y’ubumwe n’iterambere birambye. Yongeyeho ko siporo ifite uruhare rukomeye mu kurinda urubyiruko ingeso mbi, irushishikariza gukorera hamwe no kubaka ejo hazaza heza.
Yanibukije amakipe yose azitabira aya marushanwa gukina mu mucyo, kubahiriza amategeko agenga umukino, no kurangwa n’indangagaciro nziza ziranga siporo nyarwanda.
Iki gikorwa cyo gutangiza amarushanwa cyaranzwe n’umukino wo gufungura wahuje amakipe y’Imirenge ya Ngororero na Sovu. Ikipe y’abagabo y’Umurenge wa Ngororero yatsinze iya Sovu ibitego 7-0, naho no mu cyiciro cy’abagore byagenze uko.
Igikorwa cyasojwe gitanga icyizere ko amarushanwa y’Umurenge Kagame Cup azagenda neza, akazagira uruhare rufatika mu iterambere ry’urubyiruko no mu mibereho myiza y’abaturage b’Akarere ka Ngororero muri rusange.
Kayitesi Carine
