Mu Murenge wa Kigarama, Akarere ka Kicukiro, kuri uyu wa Gatanu tariki ya 10 Mata 2026, habereye igikorwa cyo kwibuka ku nshuro ya 32 Jenoside yakorewe Abatutsi mu 1994, hibandwa ku gukomeza gusigasira ubumwe bw’Abanyarwanda no kurinda ibyagezweho nyuma ya Jenoside.
Iki gikorwa cyabereye muri Salle ya Mwanukundwa guhera saa saba n’igice (13h30), cyitabirwa n’abayobozi, umuryango Ibuka n’abaturage, kikaba cyabanjirijwe no gushyira indabo ku Rwibutso rwa Jenoside rwa Gikondo rushyinguyemo imibiri y’abishwe muri Jenoside.
Depite Dr. Umutesi Liliane, wari umushyitsi mukuru, yagaragaje ko kwibuka ari umwanya wo kuzirikana amateka no kongera imbaraga mu kubaka igihugu kirangwa n’ubumwe n’ubudaheranwa.
Yagize ati: “Turasabwa gukura isomo mu byabaye, tukarinda ibyagezweho, no gukomeza kubaka u Rwanda rurenze uko turubona uyu munsi.”
Yashimangiye ko u Rwanda rumaze kugera kuri byinshi birimo uburezi kuri bose, ubwisungane mu kwivuza, gufasha abatishoboye n’iterambere ry’imibereho myiza y’abaturage, asaba Abanyarwanda kubisigasira no kubiteza imbere.
Ku ruhande rw’umuryango Ibuka mu Murenge wa Kigarama, Niyongira James, wari uhagarariye ubuyobozi bwawo, yibukije ko nyuma ya Jenoside, igihugu cyongeye kubakwa ku musingi w’ubumwe, asaba Abanyarwanda gukomeza gukorera igihugu cyabo no kuraga urubyiruko indangagaciro zo kugikunda.
Yagize ati: “Icyo dusabwa ni ugukomeza gukorera neza igihugu cyacu no gutoza abana bacu kugikunda no kugikorera.”
Perezida wa Njyanama y’Umurenge wa Kigarama, Muzora Aimé, na we yagaragaje ko kwibuka Jenoside atari igikorwa cy’umunsi umwe gusa, ahubwo ari urugendo ruhoraho rusaba uruhare rwa buri wese.
Yagize ati: “Kwibuka ni inshingano ya buri wese, kandi tugomba guhora twiyibutsa amateka yacu kugira ngo dukomeze kubaka ejo hazaza heza.”
Iki gikorwa cyasojwe hibutswa ko kubaka ubumwe n’ubudaheranwa, gusigasira ibyagezweho no kwigira ku mateka ari byo bizafasha Abanyarwanda gukomeza gutera imbere no gutuma Jenoside itazongera kubaho ukundi.
Kayitesi Carine
