Kuwa gatanu, tariki ya 17 Mata 2026, Urugaga rw’abikorera mu Rwanda (PSF/Private Sector Fedelation) rwifatanije n’Abanyarwanda kwibuka ku nshuro ya 32 Jenoside yakorewe Abatutsi mu Rwanda mu 1994. Umuhango wabereye i Gikondo mu mujyi wa Kigali, ku cyicaro gikuru cya PSF, hibukwa by’umwihariko abahoze ari abakozi barwo n’abikorera muri rusange bazize Jenoside.
Twagirumukiza Francois, Umuyobozi Mukuru wa PSF, avuga ko iki gikorwa ari ingirakamaro mu rwego rwo kwifatanya n’Abanyarwanda bose mu kwi buka Jenoside.
Agira ati: “ Ni ngombwa kwibuka bagenzi bacu n’abikorera muri rusange bazize jenoside. Ni igikorwa ngarukamwaka cyo kubaha agaciro, turwanya jenoside n’ingengabitekerezo yayo, kugirango jenoside itazongera kubaho ukundi. Ikibabaje ni uko muri iyo jenoside hagarayemo uruhare rwa bamwe mu bikorera. Ni ngombwa ko dusubiza amaso inyuma tukareba uko jenoside itazongera kubaho ukundi, ni umukoro wacu.”
Mu Murenge wa Kigali, mu Karere ka Nyarugenge, kuri uwo munsi PSF yaboneyeho gutanga inkunga ingana na miliyoni eshanu z’amafaranga y’u Rwanda ( 5,000, 000 Frw) yo gufasha abarokotse Jenoside bibumbiye mu itsinda ryitwa “Abiyubaka” mu rwego kubafasha kwiteza imbere.
Mugabonake Olivier, umwe mu batangabuhamya, nyuma yo gutanga ubuhamya bwe mu nzira yo kurokoka, ibihe byari bishaririye, ubu noneho afite icyizere cyo gukomeza kubaho no kwiyubaka.
Avuga ko yashoboye kwiga ubu akaba yikorera. Agira ati” Nabashije kwiga ubu mfite ikigo cy’ikoranabuhanga, nahaye nab’abandi akazi bagera kuri 40.”
Sebahizi Prudence, Minisitiri w’ubucuruzi n’inganda asaba abikorera kurwanya ibyakongera gusenya ubumwe bw’Abanyarwanda. Agira ati “Leta ifatanije n’abikorera twiyemeje kurwanya jenoside n’ingengabitekerezo yayo mu buryo bwose. Tugomba gukumira ikintu cyose kigoreka amateka”
Urugaga rw’abikorera PSF rutangaza ko rutazahwema gufata mu gogongo imiryango y’abahoze ari abakozi barwo bazize jenoside no gutera inkunga abarokotse mu buryo bushoboka bujyanye n’ubushobozi bwarwo.
Kayitesi Carine
