Perezida wa Repubulika Iharanira Demokarasi ya Congo, Joseph Kabila yakiriye abakinnyi, abatoza n’abayobozi b’ikipe yatwaye irushanwa rya CHAN 2016, buri wese ahabwa umudali wa zahabu n’imodoka nshya yo mu bwoko bwa Toyota Land Cruiser.
Mu muhango wabereye mu ngoro y’Umukuru w’Igihugu, buri muntu wese wari mu itsinda ryakuye igikombe i Kigali, kuva ku mukinnyi kugeza ku bayobozi ba Siporo, bose bahawe imidali n’imodoka z’agaciro.
Perezida Kabila yabanje kwambika imidali ya zahabu abakinnyi bose. Uwari uyoboye ibirori yahamagaraga izina bwite rya buri mukinnyi akambikwa umudali wa zahabu w’ishimwe..
Mu birori byanatambutse kuri Televiziyo y’Igihugu, RTNC, Umukuru w’Igihugu yatanze imodoka ahereye kuri Kapiteni Joel Kimwaki, Florent Ibenge wari uhagararira abashinzwe ibya tekiniki mu ikipe, mu bayoboye ikipe hahagurutswa Constant Omari, Perezida w’Ishyirahamwe ry’Umupira w’amaguru muri Congo, FECOFA.
Mu bayobozi ba Siporo muri Congo, Umunyamabanga mukuru wa Ministeri ya Siporo, Barthélémy Okito Oleka na we yahawe urufunguzo rw’imodoka kimwe n’abandi.
Biteganyijwe ko kuri uyu wa Gatatu abakinnyi bazerekana igikombe muri Stade des Martyrs i Kinshasa, aho byitezwe ko abafana ibihumbi n’ibihumbi bazitabira uyu muhango wo kwakira igikombe ikipe yabo yatwaye nyuma yo kwihererana Mali ikayitsinda ibitego 3-0.
Umwezi.net
